Ssentebbe wa National Resistance Movement (NRM) e Lubaga era akulembera akabinja ka Bodaboda 2010 Abdullah Kitatta olunnaku olw’enkya nga 19, March, 2018 bamukomyawo mu kkooti y’amaggye e Makindye okuddamu okuwuliriza emisango egimuvunanibwa. Kitatta avunanibwa ne banne 12 okuli Sowali Ngobi, Amon Twinomujuni, Joel Kibirige, Matia Ssenfuka, Hassan Ssebata, John Kayondo, Hassan Ssengooba, Sunday Ssemogerere, John […]
Ssentebbe wa National Resistance Movement (NRM) e Lubaga era akulembera akabinja ka Bodaboda 2010 Abdullah Kitatta olunnaku olw’enkya nga 19, March, 2018 bamukomyawo mu kkooti y’amaggye e Makindye okuddamu okuwuliriza emisango egimuvunanibwa.
Kitatta avunanibwa ne banne 12 okuli Sowali Ngobi, Amon Twinomujuni, Joel Kibirige, Matia Ssenfuka, Hassan Ssebata, John Kayondo, Hassan Ssengooba, Sunday Ssemogerere, John Ssebandeke, Hussein Mugema, Fred Bwanika ne Ibrahim Ssekajja emisango egyenjawulo omuli okusangibwa n’ebintu by’amaggye omuli ebyambalo n’engatto, okusangibwa ne sitoowa y’ebintu y’ebyokulwanyisa n’emisango emirala.
Kinnajjukirwa nga 28, Febwali, 2018, Kitatta ne banne nga bakulembeddwamu munnamateeka wabwe Shaban Sanywa bakiriza okwewozaako mu kkooti y’amaggye n’okwanukula emisango gyona egibavunanibwa oluvanyuma lw’okwebuuza ku bantu abenjawulo wadde mukusooka baali bakiwakanyiza.
Kkooti ng’ekubirizibwa ssentebbe Lt. Gen. Andrew Gutti n’olunnaku olw’enkya y’egenda okuwuliriza emisango gye Kitatta.
Kitatta yasindikiddwa mu kkomera ly’amaggye e Makindye okuva e Luzira gye yali era gye bagenda okumugya ate banne 12 basindikibwa ku limanda e Luzira era nabbo gye bagenda okuva.
Kitatta yakwatibwa mu Janwali ne banne aba bodaboda 2010 mu kikwekweeto eky’amaggye oluvanyuma lw’okukwata muganda we Huzairu Kiwalabye ku bigambibwa nti yalina omukono ku nfa ya Francis Ekalungar eyali omubazi w’ebitabo bya Case hospital mu Kampala era omulambo gwe gwasangibwa nga gwokeddwa ebbali w’ekkubo mu bitundu bye Kajjansi, Entebbe.
