Poliisi etekateeka okwekebejja obwongo bw’omusajja eyakwattiddwa ng’akutte embukuuli y’omuggo nga yeesumise olubugo okulumba, omulabirizi w’e Namirembe Rt. Rev Wilberforce Kityo Luwalira, okumutusaako obulabe olunnaku olw’eggulo ku Ssande mu kitambiro kya mmisa. Omusajja ono eyeyise Herbert Kaddu myaka 35 mutuuze w’e Makaaya e Lubaga, yajjidde mu mmotoka ekika kya ‘super custom’ n’agisimba ku mulyango gwa wankaaki […]
Poliisi etekateeka okwekebejja obwongo bw’omusajja eyakwattiddwa ng’akutte embukuuli y’omuggo nga yeesumise olubugo okulumba, omulabirizi w’e Namirembe Rt. Rev Wilberforce Kityo Luwalira, okumutusaako obulabe olunnaku olw’eggulo ku Ssande mu kitambiro kya mmisa.
Omusajja ono eyeyise Herbert Kaddu myaka 35 mutuuze w’e Makaaya e Lubaga, yajjidde mu mmotoka ekika kya ‘super custom’ n’agisimba ku mulyango gwa wankaaki oguyingira mu Lutikko olwo n’adduka ng’ayolekera wolotaali era abadduukirize okwabadde abaweereza beekanze omusajja abayiseeko mu kusaba okutandika ku ssaawa emu ey’okumya.
Ku wolotaali gye yasanze omulabirizi Luwalira nga yaakamala okusembeza Abakristaayo era yabadde adduka nnyo ng’awanise omuggo yagezezzaako okubuuka olukomera olwawula Omulabirizi n’abakristaayo we basemberera kyokka n’alemererwa n’atalantuka n’agwa wansi we baamuyooledde okumufulumya ebweru.
Okusinzira ku mwogezi wa Poliisi mu Kampala n’emirirwano Luke Owoyesigyire, bafunye okutegezebwa nti Kaddu, yafunye obuzibu ku mutwe era famire yabadde efunye ekiwandiiko okumutwala mu ddwaliro e Butabika, okufuna obujanjabi.
Mu kiseera kino Kaddu ali mu kaduukulu ka Poliisi ku Kampala Mukadde era essaawa yonna bagenda kumutwala mu ddwaliro okumwekebejja obwongo.
