Afande Kirumira Muhammad yattiddwa olunnaku olw’eggulo ku Lwomukaagamu nga bava ku mukolo gw’okwanjula e Nsangi ng’adda e Bulenga mu maka ge nga yakubiddwa amasasi ne bamutwala mu ddwaaliro e Lubaga kyoka oluvanyuma yalangiriddwa nti afudde. Mu mmotoka namba UAJ 228V, Afande Kirumira yabaddemu n’omuwala ategerekeseko erya Rasty era naye yatiddwa. Bibino ebifudde Afande Kirumira owenjawulo […]
Afande Kirumira Muhammad yattiddwa olunnaku olw’eggulo ku Lwomukaagamu nga bava ku mukolo gw’okwanjula e Nsangi ng’adda e Bulenga mu maka ge nga yakubiddwa amasasi ne bamutwala mu ddwaaliro e Lubaga kyoka oluvanyuma yalangiriddwa nti afudde.
Mu mmotoka namba UAJ 228V, Afande Kirumira yabaddemu n’omuwala ategerekeseko erya Rasty era naye yatiddwa.
Bibino ebifudde Afande Kirumira owenjawulo mu kitongole kya Poliisi
1 – Kirumira yaweerereza ku poliisi ya Old Kampala ng’alina ejjinja limu we baamuggya okumuteeka ku poliisi ku kisaawe e Nakivubo okutambuza emirimu.
2 – Ku poliisi ku kisaawe kye Nakivubo, yakolawo okumala ekiseera ne bamuzzaayo ku Old Kampala.
3 – Yalinnyisibwa ku ddaala ne bamusindika e Nakulabye n’akaabya ababbi era eno yavaayo nga yeekokkola nti abagaba ebicupuli bamulimiridde mu bakama be ne bamukyusa.
4 – Yasindikibwa e Kikaaya eno gye yataayiriza abavubuka ba Kasolo group era ajjukirwa ng’avuga akagaali ku Northern Bypass ng’agoba ababbi okwatibwa era abatuuze bamwagala nnyo.
5 – Oluvannyuma yasindikibwa e Nansana, okuvaayo ng’ababbi bamwasimula bugolo ne bamuzza mu Kisenyi ku poliisi ya Muzaana.
6 – Oluvannyuma yaddizibwa e Nansana kyokka eno yafunirayo ebizibu ne bamuggalira era yasinziira mu kaduukulu e Nsambya n’ayogera n’abaamawulire ku ssimu ensonga ezenjawulo.
7 – Baamusindika n’addayo okutendekebwa e Jinja olwavaayo ne bamusindika e Kasese ku nsalo ya Uganda ne Congo.
8 – Yakomezebwawo mu Kampala ng’afunye amayinja asatu n’afuulibwa omuduumizi wa poliisi ya old Kampala gye baamuggye okumutwala e Buyende.
9 – Poliisi yamuggulako emisango egyenjawulo n’akwatibwa n’aggalirwa e Nalufenya. Oluvannyuma emisango egisinga gyamuggyibwako era abadde akyogera lunye nti ye tajja kudda mu poliisi agenda kuyingira byabufuzi, agende mu Paalamenti.
10 – Abadde musajja awakanya emirimu gya Poliisi nti mulimu abasirikale abakyamu era Omukulembeze w’eggwanga lino Yoweri Kaguta Museveni mu kukyusa Gen Kale Kayihura namusikiza Okoth Ochola okuddumira Poliisi yasanyuka nnyo.
