Poliisi erabudde omuyimbi Weasel Manizo nti essaawa yonna bagenda kumukwata wadde yekwese. Ku Lwokutaano nga 25, Janwali, 2019, Weasel, Chagga ne Musinguzi Montions babadde bayitiddwa okweyanjula ku kitebe kya Poliisi ekinoonyereza ku buzzi bw’emisango e Kibuli ku nsonga z’ennyimba z’omugenzi Mowzey Radio. Omwogezi wa poliisi atwala ekitongole ekinoonyereza ku buzzi bw’emisango Vicent Ssekate, aba famire […]
Poliisi erabudde omuyimbi Weasel Manizo nti essaawa yonna bagenda kumukwata wadde yekwese.
Ku Lwokutaano nga 25, Janwali, 2019, Weasel, Chagga ne Musinguzi Montions babadde bayitiddwa okweyanjula ku kitebe kya Poliisi ekinoonyereza ku buzzi bw’emisango e Kibuli ku nsonga z’ennyimba z’omugenzi Mowzey Radio.
Omwogezi wa poliisi atwala ekitongole ekinoonyereza ku buzzi bw’emisango Vicent Ssekate, aba famire y’omugenzi Radio nga bakulembeddwamu nnyina w’omugenzi Kasubo Jane babatuukiridde nga bemulugunya ku nnyimba z’omugenzi ezabibwa.
Aba famire bagamba nti ennyimba z’omugenzi Radio waliwo abaziba mu situdiyo ne maka gaabwe e Makindye era mu kiseera kino waliwo abayimbi abatandiise okuziyimba.
Poliisi yatandiise okunoonyereza ku nsonga eyo era ku Lwokutaano, Weasel, Chagga ne Montions babadde balindiriddwa e Kibuli okwenyonyolako n’okwewozaako ku nsonga ezo wabula Chagga yekka yasobodde okweyanjula ku Poliisi.
Ku nsonga eyo, Ssekate agambye nti Poliisi erina okunoonya Weasel ne Montions banyonyole ku nsonga eyo.
Agamba nti wadde badduse oba ne bekweka, tebayinza kusinga Poliisi bukodyo era bonna bagenda kunoonyezebwa era bwe kiba kyetagisa kubatwala mu kkooti, bagenda kukikola.
