Omusirikale wa poliisi David Ssali agambibwa okukuba Ronald Ssebulime amasasi n’amutta ng’ateberezebwa okugoberera minisita w’eggwanga ow’ebyamawulire ne tekinologiya Idah Nantaba amutuseeko obulabe, aguddwako omusango gw’obutemu. Corporal David Ssali myaka 46 okuva ku Poliisi y’e Nagalama, asimbiddwa mu maaso g’omulamuzi w’eddaala erisooka e Mukono Mariam Nulugya. Okusinzira ku ludda oluwaabi, nga 24, March, 2019, mu katawuni […]
Omusirikale wa poliisi David Ssali agambibwa okukuba Ronald Ssebulime amasasi n’amutta ng’ateberezebwa okugoberera minisita w’eggwanga ow’ebyamawulire ne tekinologiya Idah Nantaba amutuseeko obulabe, aguddwako omusango gw’obutemu.
Corporal David Ssali myaka 46 okuva ku Poliisi y’e Nagalama, asimbiddwa mu maaso g’omulamuzi w’eddaala erisooka e Mukono Mariam Nulugya.
Okusinzira ku ludda oluwaabi, nga 24, March, 2019, mu katawuni k’e Nagojje mu Disitulikiti y’e Kayunga, Corporal Ssali yakuba Ssebulime amasasi agamuttirawo, yakwatibwa n’assibwa ku kabangali ya poliisi oluvannyuma n’aggyibwako n’akubwa amasasi emirundi ebiri n’attibwa.
Rachael Namutebi akikiridde oludda oluwaabi, asabye omulamuzi Nulugya okuboongera obudde kuba bakyanoonyereza.
Omulamuzi Nalugya asindise ku Corporal Ssali Limanda mu kkomera e Luzira okutuusa nga 30, April, 2019.
Kigambibwa nti Ssebulime ng’ali n’omusajja ataategeerekeka baagoberera minisita Nantaba n’ekigendererwa ky’okumutuusaako obulabe bwe yali ava e Kayunga gy’akiikirira mu palamenti ng’omubaka omukazi ng’ada e Kampala.
Mmotoka ya Nantaba eyalimu omukuumi we era kigambibwa nti yasaba poliisi obuyambi, eyamugoberera n’efunza Ssebulime mu katawuni k’e Nagojje nattibwa.
Wabula aba Famire nga bakulembeddwamu munnamateeka waabwe Muwada Nkunyingi basabye Poliisi okuvaayo okubategeeza webatuuse ku nsonga za Minisita Nantaba kuba yeyavaako omuntu waabwe Ssebulime okuttibwa.
