Kkooti y’amaggye e Makindye etandika enkya ya leero okuwuliriza emisango egivunanibwa Ssentebbe wa National Resistance Movement (NRM) e Lubaga era akulembera akabinja ka Bodaboda 2010, Abdullah Kitatta ne banne. Kkooti okutekateeka olunnaku olwaleero, kyava ku ludda oluwaabi nga lukulembeddwamu Maj Raphael Mugisha okutegeza ssentebbe wa kkooti Lt. Gen. Andrew Gutti nti bbo bakomekereza okunoonyereza kwabwe […]
Kkooti y’amaggye e Makindye etandika enkya ya leero okuwuliriza emisango egivunanibwa Ssentebbe wa National Resistance Movement (NRM) e Lubaga era akulembera akabinja ka Bodaboda 2010, Abdullah Kitatta ne banne.
Kkooti okutekateeka olunnaku olwaleero, kyava ku ludda oluwaabi nga lukulembeddwamu Maj Raphael Mugisha okutegeza ssentebbe wa kkooti Lt. Gen. Andrew Gutti nti bbo bakomekereza okunoonyereza kwabwe era kkooti yesigadde, okutekawo olunnaku, okutandiika okulumiriza abavunanibwa.
Kkooti egeenda kubirizibwa Ssentebbe waayo Lt. Gen. Gutti, Kitatta bagenda kumugya mu kkomera ly’amaggye e Makindye ne banne mu kkomera e Luzira.
Kitatta avunanibwa ne banne 12 okuli Sowali Ngobi, Amon Twinomujuni, Joel Kibirige, Matia Ssenfuka, Hassan Ssebata, John Kayondo, Hassan Ssengooba, Sunday Ssemogerere, John Ssebandeke, Hussein Mugema, Fred Bwanika ne Ibrahim Ssekajja emisango egyenjawulo omuli okusangibwa n’ebintu by’amaggye omuli ebyambalo n’engatto, okusangibwa ne sitoowa y’ebintu y’ebyokulwanyisa n’emisango emirala.
Kitatta yakwatibwa mu Janwali ne banne aba bodaboda 2010 mu kikwekweeto eky’amaggye oluvanyuma lw’okukwata muganda we Huzairu Kiwalabye ku bigambibwa nti yalina omukono ku nfa ya Francis Ekalungar eyali omubazi w’ebitabo bya Case hospital mu Kampala era omulambo gwe gwasangibwa nga gwokeddwa ebbali w’ekkubo mu bitundu bye Kajjansi, Entebbe.
Mungeri y’emu enkya ya leero, kkooti y’emu lw’egenda okuwuliriza okusaba kwa Kitatta kweyatekaayo ng’asaba okweyimirirwa asobole okwewozaako ku misango egimuvunanibwa ng’ava bweru wa kkomera.
Kitatta mu kusaba kwe, yategeeza nti musajja alina obuvunanyizibwa ng’abantu bangi nnyo bateekeddwa okulabirira, alina ekirwadde ate mu kkomera tasobola kufuna bujanjabi, eddembe lye erimuweebwa ssemateeka wa Uganda n’ensonga endala.
