Bya Nalule Aminah Omusango oguvunaanibwa omusomesa w’e Makerere, Dr. Stella Nyanzi, gwongezedwaayo okutuusa nga 20th/March 2019, oluvannyuma lw’Omulamuzi aguli mu mitambo obutalabikako enkya ya leero ku kkooti ya Buganda Road. Nyanzi avunaanibwa okuvvoola erinnya ly’omukulembeze w’eggwanga, Pulezidenti Yoweri Kaguta Museveni, ne maamawe, omugenzi Esteri Kokundeka, ng’ayita ku mikutu gya yintanenti. Omulamuzi Robert Mukhanza, yeeyayongezzaayo omusango […]
Bya Nalule Aminah
Omusango oguvunaanibwa omusomesa w’e Makerere, Dr. Stella Nyanzi, gwongezedwaayo okutuusa nga 20th/March 2019, oluvannyuma lw’Omulamuzi aguli mu mitambo obutalabikako enkya ya leero ku kkooti ya Buganda Road.
Nyanzi avunaanibwa okuvvoola erinnya ly’omukulembeze w’eggwanga, Pulezidenti Yoweri Kaguta Museveni, ne maamawe, omugenzi Esteri Kokundeka, ng’ayita ku mikutu gya yintanenti.
Omulamuzi Robert Mukhanza, yeeyayongezzaayo omusango guno, ku lwa munne Gladys Kamasanyu, ataabaddewo.
Oludda oluwaabi lugamba nti, Nyanzi ennaku z’o mwezi nga 16, ne 17, September, 2018, yateeka obubaka ku mutimbagano gwa ‘facebook’ n’ekigendererwa eky’okutabangula emirembe gy’omukulembeze w’eggwanga ne Maamawe, ekintu ekikontana n’amateeka agafuga ebyempuliziganya n’enkozesa ya kompyuuta.
Nyanzi yakwatibwa oluvannyuma lw’okulumba ku Poliisi y’e Wandegeya, gye yali agenze okubasaba olukusa lw’okwekalakaasa ng’awakanya abakulira yunivaasite ya Makerere, okugaana okumuzza ku mulimugwe nga kkooti bweyali eragidde.
Kinajjukirwa nti Nyanzi , yayimirizibwa ku mulimu gw’obunoonyereza ku yunivaasite y’e Makerere, olw’ebigambibwa nti yali yeeyisizza mungeri emutyoboola oluvanyuma lw’okweyambula engoye ze ng’afunye obutakkaanya ne mukamaawe, Polofeesa Mahmood Mamdani mu 2016.
Dr Nyanzi abadde ku limanda okuva mu November wa 2018 oluvanyuma lw’okugaana omukisa ogwamuweebwa okweyimirirwa.
