Poliisi e Mityana atandiise okunoonyereza ku ttemu erikoleddwa ku ‘landlord’ abadde nannyini ttaka okutudde ebyalo 3 okuli Minana, Galaba mu ggombolola y’e Tamu. Muhammad Kamada Mulinde attiddwa era omulambo gwe, gusangiddwa mu kitaba ky’omusaayi, ebbali w’ekkubo. Kigambibwa, abadde alina obutakaanya n’abasenze ku ttaka lye abasukka 400 era ng’ali muntekateeka z’okubasengula. Okuttibwa, abadde ali mu kutambula […]
Poliisi e Mityana atandiise okunoonyereza ku ttemu erikoleddwa ku ‘landlord’ abadde nannyini ttaka okutudde ebyalo 3 okuli Minana, Galaba mu ggombolola y’e Tamu.
Muhammad Kamada Mulinde attiddwa era omulambo gwe, gusangiddwa mu kitaba ky’omusaayi, ebbali w’ekkubo.
Kigambibwa, abadde alina obutakaanya n’abasenze ku ttaka lye abasukka 400 era ng’ali muntekateeka z’okubasengula.
Okuttibwa, abadde ali mu kutambula okuwa abakulembeze ebbaluwa ezibayita mu lukiiko, Minisita omubeezi ku nsonga z’ettaka Persis Namuganza lw’abadde ayise, okutema empenda ku butakaanya obuliwo.
Ssentebbe w’ekyalo Minana, Ibrahim Muyingo, agamba nti obutakaanya ku ttaka buluddewo era abakulembeze b’okuntiko ensonga okuzikwata akasoobo, y’emu ku nsonga lwaki Mulinde attiddwa.
Ate Jeremiah Kalangwa omu ku batuuze agambye nti Mulinde, abadde asukkiridde okusindikiriza abasenze ku ttaka lye, nga bangi bakoowa dda embeera ey’okubatisatiisa okubasengula.
Ate Deo Kiruna nga naye mutuuze ku kyalo Minana agamba nti abakulembeze bangi batudde omuli n’eyali adduumira Poliisi mu Gen Kale Kayihura ogonjoola obutakaanya kyokka bonna balemeddwa.
Eby’okutta Mulinde, omwogezi wa Poliisi mu bitundu bya Wamala Norbert Ochom agamba nti Mulinde atemeddwa nnyo ebiso abantu abatamanyiddwa era afudde olw’omusaayi omungi ogumuvuddemu.
Mungeri y’emu agambye nti Poliisi, etandiise okunoonyereza abatemu abenyigidde mu kutta Mulinde bakwatibwe era asabye abatuuze okolagana ne Poliisi ku nsonga eyo.
Ettaka erikayanirwa litudde ku bugazi bwa ‘square mile’ emu era abatuuze bagamba nti kiswaza okubasindikiriza ku ttaka kwe bakulidde, bazaalidde abaana n’okuziikako bakitaabwe ne bajjajjabwe.
