ESSANYU! FUFA Pulezidenti Moses Magogo ne Abdul Katuntu eyali owa FDC bagudde mu bintu, Godfrey Kiwanda Ssubi bamukomezaawo mu buyinza
Olukiiko lw’oku ntikko aka Central Executive Committee (CEC) mu kibiina ki National Resistance Movement (NRM) lulonze eyali munnakibiina ki Forum for Democratic Change Abdu Katuntu ne Pulezidenti w’ekibiina ekikulembera omupiira gw’ebigere ekya Federation of Uganda Football Associations (FUFA) Moses Magogo ku bwa ssentebe ku bukiiko bwa Palamenti y’e 11.
Okusinzira ku ‘lisy’ y’ekibiina ki NRM, Katuntu eyali ssentebe w’akakiiko akalondoola ensasaanya ya ssente mu Palamenti y’e 10 Commissions Statutory Authorities and State Enterprises (Cosase), alondeddwa nga ssentebe w’akakiiko aka Rules, Privileges and Discipline Committee era wakumyukibwa omubaka we Gulu East Fr Charles Onen.
Katuntu yawangula eky’omubaka we Bugweri mu Janwali, 2021 nga yindipendenti.
Abalala abalondeddwa mwe muli Moses Magogo nga ssentebe w’akakiko ka ICT and National Guidance (Tekinologye n’okulumya eggwanga) era agenda kumyukibwa Igeme Nabeta (Jinja South East City).
Eyali Minisita w’ensonga z’abakozi David Karubanga asindikiddwa ku kakiiko akalondola enkola y’emirimu (Physical infrastructure Committee), Dr Charles Ayume atwaliddwa kakiiko k’ebyobulamu aka Health Committee ate Fox Odoi asindikiddwa ku kakiiko k’eddembe ly’obuntu (Human Rights).
Abalala abadde Minisita w’ebyobulambuzi Godfrey Kiwanda Ssubi asindikiddwa mu Palamenti ya East Africa eya East African Legislative Assembly okudda mu bigere bya Mathias Kasamba eyafa mu April, 2021.
Kiwanda yabadde amyuka ssentebe wa NRM (Pulezidenti Museveni) mu Buganda kyokka mu Kabinenti yasuuliddwa.
Yabadde Minisita omubeezi ow’ebyobulambuzi era abadde akoze nnyo mu kutumbula chapati y’amagi (Rolex), abakyala abalina obubina n’okwagaza bannayuganda okulambula ensi yaabwe.
Pulezidenti Museveni yalonze Martin Mugarra okudda mu bigere bya Kiwanda.
Mungeri akakiiko ka Bajeti, NRM eronze Patrick Opolot Isiagi nga ssentebe, akakiiko ku byenfuna by’eggwanga basindiseeyo John Ikojo Bosco ate akakiiko k’obwenkanya kaweereddwa Judith Alyek nga ssentebe.
Okusinzira ku mwogezi w’ekibiina ki NRM Rogers Mulindwa, akakiiko ka CEC katuula nga 7, July, 2021 nga kakulembeddwamu ssentebe w’ekibiina Yoweri Kaguta Museveni, bamemba bakaanya ku bantu abaalondeddwa.
Ne ku mulundi guno, NRM yesiinga ababaka ba Palamenti, ekibiina ki National Unity Platform (NUP) kikwata kyakubiri ate FDC yakwata kyakusatu.
Ebirala ebifa mu ggwanga – https://www.facebook.com/GalaxyFm1002/videos/193712939367551
