AMAZIGA! Wuuno omusirikale afudde mu ngeri etabudde abatuuze, amasasi gakubiddwa ate Poliisi y'e Kibuku ezudde omulambo gw'omuvubi Kato
Poliisi y’e Mityana etandiise okunoonyereza ku kyavuddeko omusirikale okufa okumpi n’amakaage olunnaku olw’eggulo ku Lwomukaaga.
Omusirikale Patrick Nuwagaba, abadde akulira Poliisi y’e Kakindu mu disitulikiti y’e Mityana, yasangiddwa ng’afudde okumpi ne mmotoka ye, mita nga 500 n’amakaage ku kyalo Mayirye mu ggoombolola y’e Kakindu.
Kigambibwa Omusirikale Nuwagaba yafudde ku ssaawa nga 8 ez’ekiro.
Rachel Kawala, omwogezi wa Poliisi mu bitundu bye Wamala, agamba nti omulambo gutwaliddwa mu ddwaaliro ekkulu e Mityana okwekebejjebwa okuzuula ekiyinza okuba nga kyaviiriddeko Nuwagaba okufa.
Kawala agamba nti ebiriwo biraga nti Nuwagaba, kiteeberezebwa nti yafunye akabenje, omulambo gwe gwasangiddwa okumpi n’emmotoka ng’alina ebiwundu ku mutwe ssaako n’emmundu okumpi n’omulambo.
Abamu ku batuuze bagamba nti Nuwagaba yabadde ava ku mukolo gwa mbaga kyokka ku ssaawa nga 8 ez’ekiro, bagamba nti waliwo amasasi agaakubiddwa.
Ate omu ku basirikale agaanye okwatuukiriza amannya ge, agambye nti mu mmotoka ya Nuwagaba temusangiddwamu wadde ettondo ly’omusaayi.
Omusirikale Nuwagaba okuttibwa nga wakayita sabiiti emu yokka nga waliwo abasirikale abazze battibwa mu disitulikiti y’e Mityana.
Nga 7, Desemba, 2021, Corporal Alfred Oketch ne Police Constable Moses Kigongo okuva ku Poliisi y’e Busunju e Mityana, battibwa ku kyalo Sebobo mu ggoombolola y’e Sekanyonyi.
Mu Novemba, 2021, waliwo omusirikale mu disitulikiti y’e Soroti yattibwa emmundu netwalibwa.
Nga 26, Ogwekkumi, 2021, abazigu baalumba fakitole ku kyalo Kigalama mu disitulikiti y’e Kassanda ku luguudo lwe Mityana – Mubende era omusirikale omu yattibwa n’okulumya abalala babiri (2).
Ate Poliisi y’e Kibuku ezudde omulambo gw’omuvubi ku kizinga kye Bugiri.
Omugenzi ategerekeseeko nga Geoffrey Kato myaka 22 abadde omutuuze ku kyalo Kabusule mu ggoombolola y’e Bugiri.
Omulambo gwazuuliddwa akawungeezi k’olunnaku Olwokutaano era ekigambibwa yagudde mu mazzi bwe yabadde agenze okuvuba ku River Mpologoma.
Immaculate Alaso, omwogezi wa Poliisi mu bitundu bye Bukedi South, omulambo gwa Kato guzuuliddwa oluvanyuma lwa batuuze okuyambako Poliisi mu kunoonya omulambo.
Poliisi egamba nti embeera ku mazzi, y’emu ku nsonga lwaki Kato kati z’embuyaga ezikunta.
Ebirala ebifa mu ggwanga – https://www.youtube.com/watch?v=07CeqScsi7Y
