Poliisi y’e Kabalagala ekutte omukyala ku misango gy’okutambuza vidiyo n’ebifaananyi eby’obuseegu ng’ayita ku mikutu migatta bantu. Omukyala Nakaziba Oliver, yakwatiddwa ku misango gy’okutandikawo omukutu ogwa ‘Module Center’ gw’abadde asinga okweyambisa mu kutambuza vidiyo. Nakaziba abadde alina abakozi ab’enjawulo mu kutambuza vidiyo ez’obuseegu era mu kikwekweeto, Poliisi ekutteko 4. Abakwate kuliko Wainawalo Ester myaka 18, Matovu […]
Poliisi y’e Kabalagala ekutte omukyala ku misango gy’okutambuza vidiyo n’ebifaananyi eby’obuseegu ng’ayita ku mikutu migatta bantu.
Omukyala Nakaziba Oliver, yakwatiddwa ku misango gy’okutandikawo omukutu ogwa ‘Module Center’ gw’abadde asinga okweyambisa mu kutambuza vidiyo.
Nakaziba abadde alina abakozi ab’enjawulo mu kutambuza vidiyo ez’obuseegu era mu kikwekweeto, Poliisi ekutteko 4.
Abakwate kuliko Wainawalo Ester myaka 18, Matovu Patricia, 18, Katusiime Mackline 20 ne Atim Ritar myaka 25.
Okusinzira ku mwogezi wa Poliisi mu ggwanga Fred Enanga, Nakaziba abadde alina ennyumba e Kabalagala nga buli muwala alina omuzigo nga singa omuntu yenna, yeeyambisa omukutu ogwa ‘Module Center”, bamutwala butereevu mu kazigo k’omuwala omuli kkamera.
Enanga, agamba nti abawala ku myaka emito, bazina amazina nga bali bwereere mu ngeri y’okusabbalaza buli musajja ali ku mukutu.
Mu kikwekweeto, Poliisi yazudde kompyuta 5 ezibadde zeyambisibwa mu kutambuza vidiyo z’obuseegu.
Abakwate mu kiseera kino bali ku Poliisi y’e Kabalagala ku misango gy’okutambuza vidiyo n’ebifaananyi eby’obuseegu era essaawa yonna babatwala mu kkooti.
